Abundant Life Home

Naupang Chanhaite Puala Rawngbawlna – Abundant Life Home hi MFC President, Rev. Dr. Lalchungnunga’n vision a lo neih tawh leh tawngtainaa kum tamtak a lo hlan tawh thin a ni a, amaherawhchu hmalak theihna a awm lova. Mahnia va zawn leh dapchhuah ni miah lovin, nikhat chu naupang chanhai Unau 3 te chu MFC Centre-­ah mi thahnemngai thenkhat ten an rawn hruailut hlawl mai a. Chu mi ni February 15, 2005 atang chuan Pathian kawng hawnsakna nia ngaiin HOME hi neih tan a lo ni ta a ni.

Tin, March 3, 2005 chuan Pi Biakdawli, Aizawl Venglai chu Naupangte enkawlna lam atana Pathian kohna chang niin, MFC-­ah chuan Pathianin a rawn hruailut a, Executive Committee chuan Naupangte enkawltu tur atan a pawm ta a ni.

Kawng hrang hrangin Pathian kaihhruaina he Home hian a dawng chho zel a, unau thahnemngaite an thinlunga lainatna leh hmangaihna neia Pathianin a buatsaihte chu nasa takin he naupang enkawlna kawngah hian mi tangkai tak tak an lo ni chho ta zel a. Hengte avang hian lawmthu nasa takin Pathian hnenah kan sawi bawk a ni.

June 21, 2007 hian Social Welfare Department, sawrkar lam atanga hriatpuina (recognition) pek a ni a. Hming hran pawh nei lovin, hun engemaw chen kalpui a nih hnu­in, Home hming atan, “ABUNDANT LIFE HOME” (Nuntam In) tih chu February 10, 2008 ah MFC Executive chuan a nemnghet ta a ni.

He home ah hian naupangten Pathian Thutak zirtirna hnuaia inkaihhruaina tha an dawn bakah, zirna lamahte leh kawng hrang hrangah enkawlna an dawng bawk a. Chung zawng zawng aia ropui chu Pathian atanga chhuak hmangaihna leh enkawl duhsakna an chang hi a ni. Nu leh pa thihsan emaw avanga Home lama tlulut thenkhat an nih laiin thenkhatte chu an nu leh pa te inthenna avanga enkawltu nei mumal tawh lo te an ni a. 

"Kan Pathian leh Pa mithmuha sakhaw biak dan thianghlim leh sual tel lo chu hei hi a ni: Fahrah leh Hmeithaite an hreawm laia kan leh khawvel bawlhhlawh kai lova insiam thin hi a ni" - Jakoba 1:22.